ಚಂದಿರನೆ

ಹೇಳು ಚಂದಿರನೆ ಹೇಳು ಸುಂದರನೆ
ಯಾರಿಗಾಗಿ ಬೆಳದಿಂಗಳು?
ಹೇಳು ಹುಣ್ಣಿಮೆಯೆ ಹೇಗೆ ಬಣ್ಣಿಸಲಿ
ನಿನ್ನಿಂದಲೇ ಚೆಂದ ಇರುಳು!

ನಿನ್ನ ನೋಡುತಲೆ ಬಿರಿವ ನೈದಿಲೆಯು
ಚೆಲುವ ತೋರುತಲಿ ನಿಂತಿದೆ
ನೀ ಬಿಸಿಯ ಸೋಕುತಲೇ ಎಲ್ಲೋ ಪ್ರೇಮಿಗೆ
ಪ್ರಿಯತಮೆಯ ನೆನಪು ತಂದಿದೆ

ಉಕ್ಕಿ ಬರುತಲಿವೆ ಶರಧಿಯಲೆಗಳು
ನಿನ್ನ ಸಂಧಿಸುವ ಆಸೆಗೆ
ಅಲೆಗಳಿಲ್ಲಿ ನೀನೆಲ್ಲೋ ದೂರದಲಿ
ಮಿಲನ ಸಾಧ್ಯವೇ ವಾಸ್ತವದಲಿ?

ಚಕೋರೆ ಕರೆದಿಹಳು ದಿನವೂ ನಿನ್ನನು
ನೀನೇ ಸ್ಫೂರ್ತಿ ಆ ಗಾನಕೆ
ನೀ ದಿನವೂ ಬಂದರೆ ಮರೆಯಾದ ತಾರೆಗಳ
ತೋರುವವರಾರು ಈ ಲೋಕಕೆ

ಬಾಡಿಗೆಯ ಬೆಳಕಲೇ ನೀನಿಷ್ಟು ಶೋಭಿಸುವೆ
ನಿನಗ್ಯಾಕೆ ಸ್ವಂತ ಬೆಳಕಿಲ್ಲ?
ಅದೇನೇ ಇರಲಿ ಕಾವ್ಯಲೋಕದಲಿ
ನೀನಿಲ್ಲದೇ ಪ್ರೇಮ ಗೀತೆಯಿಲ್ಲ

ನಿನ್ನ ಕೆಲಸವದು ಯಾರಿಂದಲಾಗದು
ಇರುಳ ಬೆಳಗುವ ಕಾಯಕ
ಬಾರೋ ಚಂದಿರನೆ ಹಾಲ್ಬೆಳಕ ಚೆಲ್ಲುತಲಿ
ಆಗು ನೀಲಾಂಬರದ ನಾಯಕ