ಮುದ್ದಿನ ಗೆಳತಿ

ನೀ ತೊರೆಸಿದೆ ನನ್ನಲ್ಲಿನ ತಬ್ಬಲಿಯ ಭಾವ
ಬೆಸೆದಿರುವೆ ನನ್ನ ಜೀವದಲಿ ನಿನ್ನ ಜೀವ
ಹಂಚಿಕೊಂಡಿಹೆ ನಿನ್ನಲ್ಲಿ ನನ್ನ ದುಃಖ ನೋವ
ನಾ ಮರೆಯೆ ನಿನ್ನ ಕೂಡೆ ನಕ್ಕ ಸಂತಸವ

ನನ್ನ ನಡವಳಿಕೆಯಲಿ ಪರಿವರ್ತನೆಯ ನೀ ತಂದೆ
ನನ್ನ ಬದುಕಿನ ಕನಸುಗಳಿಗೆ ಬಣ್ಣಗಳ ಲೇಪಿಸಿದೆ
ನನ್ನ ಬಾಳ ಬೆಳದಿಂಗಳ ಬಾನಿನಂಗಳದೆ
ಮರೆಯಬಾರದ ಮರೆಯಲಾರದ ಚುಕ್ಕಿ ನೀನಾದೆ

ಪ್ರೀತಿಯ ಸ್ನೇಹಕ್ಕೆ ನಿನ್ನಲಿ ನಿಜದರ್ಥ ಸಿಕ್ಕಿತು
ನಿನ್ನ ಸ್ನೇಹಪರ ನಡತೆಗೆ ನನ್ನ ಮನ ಸೋತಿತು
ನಿನ್ನ ಅಳು ಮೊಗವ ನೋಡೆ ನನ್ನ ಮನ ಮರುಗಿತು
ನಿನ್ನ ಸಂತಸದಲೆಂದೋ ನನ್ನ ಜೀವ ನಲಿಯಿತು

ಪುಟ್ಟ ಕಂಗಳಲೇನೋ ಅದು ಪ್ರೀತಿಯ ಧಾರೆ
ಆ ಕಂಗಳಲಿ ದ್ವೇಷವ ನಾ ಊಹಿಸಲಾರೆ
ಪ್ರೀತಿಯ ಸಾಗರ ನೀನಾಗೆ ನಾ ಪುಟ್ಟ ತೊರೆ
ನಿನ್ನ ಸೇರುವೆನೆಂಬ ನನಗೆ ಸಂತಸದ ಹೊರೆ

ನಾ ಬೇರೆ ನೀ ಬೇರೆ ಎಂಬ ಭಾವ ನನ್ನಲಿಲ್ಲ
ನಿನ್ನಲಿ ನನ್ನ ನನ್ನಲಿ ನಿನ್ನ ಕಂಡಿಹೆನಲ್ಲ
ನಿನ್ನದೇ ಪ್ರತಿಬಿಂಬ ನನ್ನ ಕಣ್ಣಿನಲೆಲ್ಲ
ನಮ್ಮ ಸ್ನೇಹದಲಿ ಹುಳುಕಿನ ಮಾತಿಲ್ಲ