ಸೊರಗಬೇಡೆನ್ನ ಕನಸೇ

ಓ ನನ್ನ ಕನಸೆ ನೀ ಯಾಕೆ ಸೊರಗುತಿಹೆ ಒಳಗೊಳಗೆ?

   ನೀ ಚೆಲ್ಲಿ ಸೂಸಿದ್ದ ಬೆಳಕು ಚದುರುತಿದೆ ನಿಶೆಯೊಳಗೆ

   ನಾ ಹೇಗೆ ಹಿಡಿದಿಡಲಿ ಚಿಮ್ಮೊ ಭಾವಗಳ ಸವಿ ಕಲರವವ

   ತಾ ನನ್ನ ಬಳಿಗಿಂದು ಹೊಸ ಬಣ್ಣದೋಕುಳಿಯ ಸಿಂಚನವ

   ಒಮ್ಮೆ ನೀನು ನನ್ನ ನೋಡಿ ಮರುಕ ತೋರು ಓ ಕನಸೆ.

ಸುಖ ನಿದ್ರೆಯಲು ಕಣ್ಣಿನ ಒಳಗೆ ನಿನ್ನದೆ ಮಿಸುಕಾಟ

   ತೆರೆದ ಕಣ್ಣಲೂ ಶೂನ್ಯದ ಒಳಗೆ ನಿಂದೇ ತಕಧಿಮಿತ

   ಅತಿಶಯವಿಲ್ಲ ಅನುಭವವೆಲ್ಲ ನನ್ನಯ ಪರಿ ಇಂತು

   ಹೀಗೆ ನೀನು ಕಾಡುವಾಗ ನನ್ನ ನೆಮ್ಮದಿ ಇನ್ನೆಲ್ಲಿ?

   ಡಂಗುರ ಸಾರಿ ಹೇಳಿದೆ ಕೂಗಿ ನಿನ್ನಯ ಉಪಟಳವ

   ಸಿಹಿ ನೋವಲೂ ನಾ ಕಂಡಿಹೆ ನೂತನ ಅನುಭಾವ

   ಅರಗಿಸಲಾಗದ ಮರೆತಿರಲಾಗದ ಏನಿದು ಈ ಗೋಳು?

   ಅಲ್ಲಿ  ಇಲ್ಲಿ ಎಲ್ಲೂ ಇಲ್ಲ ನನ್ನ ಪ್ರಶ್ನೆಗೆ ಪರಿಹಾರ

   ಕಲುಶಿತವಾದ ಭಾವಗಳೆಲ್ಲವ ಪಾವನ  ಗೊಳಿಸುವೆಯಾ?

   ಹೆಸರೇ ಇಲ್ಲದ ಕಾಮನೆಗೊಂದು ಅರ್ಥವ ನೀಡುವೆಯಾ?

   ಹುಸಿ ಸಂಬಂಧಗಳ ಪರಿ ಪಾಲನೆಯು ಇನ್ನೆಲ್ಲಿಯವರೆಗೆ?

   ವ್ಯರ್ಥವಾಯ್ತು ವೇಳೆಯಿಲ್ಲಿ ಇದೇ ಮಂಥನದೊಳಗೆ

  

   ಅಪಚಾರವನು ನೀ ಎಸಗದಿರು ನನ್ನಯ ನಂಬಿಕೆಗೆ

   ಅಪರೂಪಕೆ ನಾನೊಪ್ಪಿರುವೆ ನಿನ್ನ ವಿನಂತಿಕೆಗೆ

   ಕ್ಷೀಣಿಸದಿರಲಿ ಕ್ಷಯಿಸದೆ ಇರಲಿ ಹೃದಯದ ಸೆಳೆತಗಳು

   ಕಾದು ನಾನು ಕುಳಿತಿರುವಾಗ ಹೃದಯದ ಕರೆಯನು ರಿಂಗಣಿಸಿ         

 

ಹೋಗಲಿ ಹೇಗೆ ಅವನ ಕನಸಿಗೆ

ಕನಸಿನ ಊರಿಗೆ ಕರೆದಿಹನವನು ಬಾ ಎಂದು ನನ್ನ
ದಾರಿಯ ಕೇಳಲು ಮರೆತೇಬಿಟ್ಟೆನು ನಾ ಹೊರಡುವ ಮುನ್ನ
ವಿಳಾಸ ನೀಡದೆ ಕಾಡಿದನವನು ಇದೆಂಥ ಆಹ್ವಾನ
ನನ್ನನು ಕರೆಯುತ ತಾನೇ ತಂದಿಹ ಚೆಂದದ ಸಿಹಿ ಸ್ವಪ್ನ

ಕನಸಲ್ಲಾದರೂ ಅವನೆದೆಯರಮನೆ ನೋಡಲು ನನಗಾಸೆ
ಗೋಡೆಗೋಡೆಯಲೂ ನನ್ನದೆ ಚಿತ್ರವ ಬಿಡಿಸುವ ಮಹದಾಸೆ
ನನ್ನಯ ಚಿತ್ರವು ನೆನಪಿಸುತಿರಲಿ ಅವನಿಗೆ ನನ್ನೊಲವ
ಮರೆಯಬಾರದು ಅವನೆಂದೂ ನಮ್ಮಿಬ್ಬರ ಬಂಧನವ

ಕೈ ಕೈ ಹಿಡಿದು ಕಡಲತೀರದಿ ದೂರಕೆ ನಡೆವಾಸೆ
ಮನದಾಳದ ಮಾತನು ತುಟಿಕಚ್ಚಿ ಕಣ್ಣಲ್ಲೆ ತಿಳಿಸುವಾಸೆ
ನನ್ನ ಕಣ್ಣಿನ ಕಾಗುಣಿತಗಳ ಅವನೋದಬಲ್ಲನೆ? ನಾನರಿಯೆ!
ಅರ್ಥ ಮಾಡಿಸುವ ತವಕ ನನ್ನದು ಫಲಿಸೀತೇ ಇದು ನಾ ತಿಳಿಯೆ?

ಹೇಗೋ ಇದ್ದೆ ಹೇಗೋ ಆಗಿಹೆ ಎಲ್ಲವು ಅವನಿಂದ
ಗಮನಕೆ ಬರದೇ ಎದೆಯೊಳಗಿದ್ದ ನೋಡಿದ ಕ್ಷಣದಿಂದ
ಹೇಳಲು ಧೈರ್ಯ ಸಾಲದೆ ಹೋಯ್ತು ಮೂಕವಾಯ್ತು ಹೃದಯ
ಒಡನಾಟದಲೇ ಹಿರಿಹಿರಿ ಹಿಗ್ಗಿದ ಕ್ಷಣಗಳು ವರ್ಣಮಯ

ತಂದ ಪುಣ್ಯವು ಸಾಲದೆ ಹೋಯ್ತು ಪಡೆಯಲು ನಾನವನ
ಬತ್ತದ ಒಲವಿನ ಒರತೆಯ ತಂದ ಅಪೂರ್ವ ಸ್ನೇಹಿತನ
ಅವನ ನೆನಪದು ಸುಳಿಯದ ಕ್ಷಣಗಳು ಹುಡುಕಿದರೂ ಸಿಗದು
ಈ ಪರಿ ಕಾಡುವ ಅವನೊಲವಿಗೆ ಇನ್ನು ಹೆಸರೇನಿಡಬಹುದು?

ಓ ಕನಸುಗಳೆ ನೀವಾದರು ತಂದು ನನಗೊಪ್ಪಿಸಿ ಅವನನ್ನು
ಅವನ ಕನಸಿನ ದಾರಿಯ ಹುಡುಕುತ ನಾ ಸುಸ್ತಾಗಿಹೆನು
ಅಂಚೆಪೆಟ್ಟಿಗೆಗೆ ನನ್ನನೆ ಹಾಕಿಹೆ ಹೋಗಲು ಕನಸೊಳಗೆ
ನಾ ಪಟ್ಟಿಹ ಸಂಭ್ರಮವೆಲ್ಲವೂ ಕೂಡ ಸಿಗಲೇಬೇಕು ಅವಗೆ.

ಮುದ್ದಿನ ಗೆಳತಿ

ನೀ ತೊರೆಸಿದೆ ನನ್ನಲ್ಲಿನ ತಬ್ಬಲಿಯ ಭಾವ
ಬೆಸೆದಿರುವೆ ನನ್ನ ಜೀವದಲಿ ನಿನ್ನ ಜೀವ
ಹಂಚಿಕೊಂಡಿಹೆ ನಿನ್ನಲ್ಲಿ ನನ್ನ ದುಃಖ ನೋವ
ನಾ ಮರೆಯೆ ನಿನ್ನ ಕೂಡೆ ನಕ್ಕ ಸಂತಸವ

ನನ್ನ ನಡವಳಿಕೆಯಲಿ ಪರಿವರ್ತನೆಯ ನೀ ತಂದೆ
ನನ್ನ ಬದುಕಿನ ಕನಸುಗಳಿಗೆ ಬಣ್ಣಗಳ ಲೇಪಿಸಿದೆ
ನನ್ನ ಬಾಳ ಬೆಳದಿಂಗಳ ಬಾನಿನಂಗಳದೆ
ಮರೆಯಬಾರದ ಮರೆಯಲಾರದ ಚುಕ್ಕಿ ನೀನಾದೆ

ಪ್ರೀತಿಯ ಸ್ನೇಹಕ್ಕೆ ನಿನ್ನಲಿ ನಿಜದರ್ಥ ಸಿಕ್ಕಿತು
ನಿನ್ನ ಸ್ನೇಹಪರ ನಡತೆಗೆ ನನ್ನ ಮನ ಸೋತಿತು
ನಿನ್ನ ಅಳು ಮೊಗವ ನೋಡೆ ನನ್ನ ಮನ ಮರುಗಿತು
ನಿನ್ನ ಸಂತಸದಲೆಂದೋ ನನ್ನ ಜೀವ ನಲಿಯಿತು

ಪುಟ್ಟ ಕಂಗಳಲೇನೋ ಅದು ಪ್ರೀತಿಯ ಧಾರೆ
ಆ ಕಂಗಳಲಿ ದ್ವೇಷವ ನಾ ಊಹಿಸಲಾರೆ
ಪ್ರೀತಿಯ ಸಾಗರ ನೀನಾಗೆ ನಾ ಪುಟ್ಟ ತೊರೆ
ನಿನ್ನ ಸೇರುವೆನೆಂಬ ನನಗೆ ಸಂತಸದ ಹೊರೆ

ನಾ ಬೇರೆ ನೀ ಬೇರೆ ಎಂಬ ಭಾವ ನನ್ನಲಿಲ್ಲ
ನಿನ್ನಲಿ ನನ್ನ ನನ್ನಲಿ ನಿನ್ನ ಕಂಡಿಹೆನಲ್ಲ
ನಿನ್ನದೇ ಪ್ರತಿಬಿಂಬ ನನ್ನ ಕಣ್ಣಿನಲೆಲ್ಲ
ನಮ್ಮ ಸ್ನೇಹದಲಿ ಹುಳುಕಿನ ಮಾತಿಲ್ಲ