ನಿನ್ನ ನೆನಪು

ಎಲ್ಲಿಂದಲೋ ತಂಗಾಳಿ ಬೀಸಿ ಬಂತು
ನಿನ್ನಯ ನೆನಪೊಂದ ಹೊತ್ತು ತಂತು
ಮೊಗ್ಗಾದ ಮನವಿಂದು ಅರಳಿತಿಲ್ಲಿ
ನಿನ್ನನೇ ಸೇರುವ ಆತುರದಲ್ಲಿ

ಗಾಳಿಯ ಒಡಲಲ್ಲಿ ನಿಂದೇ ಉಸಿರು
ಸೋಕಲು ನನ್ನ ಮೈಮನ ನವಿರು
ತಂಪಿನ ಸ್ಪರ್ಶದಿ ಎನೋ ಹಿತವು
ಬಣ್ಣಿಸಲಾಗದ ಅತಿ ಸಂತಸವು

ನಿನ್ನ ನೆನೆಯುತಲೆ ಹೂವಾಗುವೆ ನಾನು
ಬಾಡುವ ಮೊದಲೇ ಪಡೆದುಕೋ ನೀನು
ನನ್ನಯ ಕಂಪು ಸೆಳೆಯದೇ ನಿನ್ನ
ಸವಿಯಲು ಬಾ ನೀ ಪ್ರೀತಿಯ ಜೇನ

ನನ್ನಯ ಬಾಳಿನ ಪ್ರತಿ ಪುಟದಲ್ಲಿ
ಬಗೆ ಬಗೆ ಬಣ್ಣವ ನೀ ತುಂಬುತಲಿ
ಹೊಸತನ ತಂದಿಹೆ ಪ್ರತಿ ಹೆಜ್ಜೆಯಲೂ
ಜೊತೆಯಲ್ಲೇ ಇರು ಪ್ರತಿ ಕ್ಷಣದಲ್ಲೂ

ನಿನ್ನೊಡನಾಟದ ಸುಂದರ ಗಳಿಗೆ
ನೆನೆದರೆ ನಗುವೆನು ನಾ ನನ್ನೊಳಗೆ
ನೆನಪಿನ ಕೊಳದಲಿ ನೀ ಜೀವಜಲ
ಮುಳುಗಿರೆ ನಾನು ಮರೆವೆನು ಎಲ್ಲ