ತೊಳಲಾಟ

ನಟಿಸಬೇಡ ಒಲವೆ ನೀನು ಬಯಕೆಗೆಲ್ಲ ಪರದೆ ಎಳೆದು
ತುಂಟಾಟಕೆ ಮಿತಿ ಇರಲಿ ಬಯಸೋ ಮನವು ನರಳುವುದು

ಪ್ರೀತಿ ಹೂವ ತೋಟದಲ್ಲಿ ಬಾಡದಂತ ಹೂವು ನೀನು
ಅರಸಿ ಬಂದೆ ನಿನ್ನ ಸೇರೆ ಮುದುಡಿ ಕುಳಿತೆ ಸರಿಯೇನು?
ನೀಲಿ ಬಾನ ಅಂಗಳದಿ ಮಿನುಗುತಿರುವ ಚುಕ್ಕಿ ನೀನು
ಕೈಯ ಚಾಚಿ ಹಿಡಿಯ ಹೊರಟೆ ಮೋಡದಡಿಯೆ ಅವಿತೆಯೇನು?

ಹಸಿರು ಹುಲ್ಲು ಹಾಸ ಮೇಲೆ ಬಿಸಿಲಿಗ್ಹೊಳೆವ ಬಿಂದು ನೀನು
ಬೊಗಸೆ ತುಂಬ ಹಿಡಿಯಬಂದೆ ಕೊಸರಿಕೊಂಡು ಹೋದೆಯೇನು
ನೀರಿನಲ್ಲಿ ಬಳುಕುತಿರುವ ಚೆಂದದೊಂದು ಮೀನು ನೀನು
ಅಲೆಯಂತೆ ಜೊತೆಯಲಿದ್ದರೂ ನಿನ್ನ ಹೆಜ್ಜೆ ಹುಡುಕಲಾರೆನು

ಬೀಸಿ ಬಂದ ಗಾಳಿಯಲ್ಲಿ ತೇಲಿಬಂದ ಕಂಪು ನೀನು
ತನುವ ಚೆಲ್ಲಿ ನಿಂತೆ ಇಲ್ಲಿ ಸೋಕದಂತೆ ಹೋದೆಯೇನು?
ನಿನ್ನುಸಿರಿನ ಆವೇಗಕೆ ತೇಲಿ ಹೋದ ಎಲೆಯು ನಾನು
ಎಲ್ಲೆಲ್ಲೋ ಸುತ್ತಿ ಬಂದೆ ಇಲ್ಲಿ ನಿನ್ನನೆಲ್ಲೂ ಕಾಣೆನು

ಪ್ರೀತಿ ತೇರ ಶಿಖರದಲಿ ಕಂಗೊಳಿಸುವ ಕಲಶ ನೀನು
ಒಳಗಿದ್ದರೂ ಇಲ್ಲದಂತ ತುಳುಕುತಿರುವ ನೀರು ನಾನು
ದೇವಗೆಂದೆ ಹೊತ್ತು ತಂದ ಪ್ರೀತಿ ಹೂವ ಮಾಲೆ ನೀನು
ನಿನ್ನ ನಡುವ ಸುತ್ತಿ ಸುತ್ತಿ ಧನ್ಯವಾದ ನಾರು ನಾನು

ಕಣ್ಣ ಎದುರಿಗದ್ದರೂ ನಾ ನಿನ್ನ ಸೇರಲಾಗದೇ
ನೆರಳಂತೆ ಜೊತೆಯಲಿದ್ದರೂ ನಮ್ಮ ಮಿಲನವಾಗದೇ
ನದಿಯ ಎರಡು ದಡಗಳು ಒಂದಾಗಲಾರದೆಂದಿಗೂ
ತೋರಿಕೆಯ ಸೇತುವೆಯು ನಮ್ಮನೆಂದು ಸೇರಿಸದು