ಬದುಕೇ ನೀ ಕಾಡಬೇಡ

ಬದುಕೇ ನನಗೆ ನಿನ್ನ ಮೇಲೆ ಯಾವ ದೂರು ಇಲ್ಲ
ನೀ ಕೇಳೋ ಪ್ರಶ್ನೆಗಳಿಗೆ ಉತ್ತರವೇ ಸಿಗುತಿಲ್ಲ
ನೀನೇ ಒಂದು ಪ್ರಶ್ನೆಯಾಗಿ ನನ್ನ ಮುಂದೆ ನಿಂತಿಹೆ
ಉತ್ತರವ ಹುಡುಕಿ ಹುಡುಕಿ ನಿನ್ನೆದುರು ಸೋತಿಹೆ

ಯಾವ ಯಾವ ತಿರುವುಗಳಿಗೆ ನನ್ನ ಎಳೆಯುತಿರುವೆ
ಬದಲಾವಣೆಗಳ ಒಪ್ಪಲು ಸಮಯ ಬೇಕು ತಿಳಿಯದೇ?
ಬದುಕಲ್ಲಿ ತಿರುವುಗಳು ತುಂಬ ಸಹಜ ತಿಳಿದಿದೆ
ತಿರುವುಗಳೇ ಬದುಕಾದರೆ ಬಾಳ ಪಯಣ ಸಾಧ್ಯವೇ?

ಧನಕನಕ ಬೇಡುತಿಲ್ಲ ನೀಡು ನನಗೆ ಶಾಂತಿಯ
ಕೋಲಾಹಲ ಎಬ್ಬಿಸದೆ ಮರೆಸಿಬಿಡು ಕ್ರಾಂತಿಯ
ಒಂಟಿಯಾಗಿ ನಿನ್ನೆದುರಿಸೋ ಗುಂಡಿಗೆ ನನಗಿಲ್ಲ
ನಂಟುಗಳೇ ಗಂಟಾಗಿವೆ ಬಿಡಿಸಲಾಗುತಿಲ್ಲ

ನಾ ಇದ್ದು ಕೂಡ ಇರಲಾರೆ ಈ ನಿನ್ನ ಆಟದಲ್ಲಿ
ನಟಿಸಿ ಕೂಡ ನಟಿಸಲಾರೆ ಈ ನಿನ್ನ ನಾಟಕದಲ್ಲಿ
ಪಾತ್ರಕೊಂದು ಜೀವ ತುಂಬೋ ಯತ್ನ ಇಲ್ಲಿ ನಡೆಸಿಹೆ
ಕೊನೆಕ್ಷಣಗಳವರೆಗೂ ನಟನೆ ಮುಂದುವರೆಸುವೆ

ಹತಾಶೆ ಎಲ್ಲ ಮರೆತು ನಾ ನಿನ್ನ ಒಪ್ಪಿಕೊಂಡಿಹೆ
ನೀ ಬಂದ ಹಾಗೆ ಸ್ವೀಕರಿಸುವ ಪ್ರಯತ್ನವ ನಡೆಸಿಹೆ
ಅತಿಯಾಗಿ ನೀನು ಕಾಡಬೇಡ ಉತ್ಸಾಹ ಕುಂದಬಹುದು
ನೀನೇ ಬೇಡವಾಗಿ ಸಾವಿಗೆ ಮುಖಮಾಡಬಹುದು