ಆಪ್ತ ಮಿತ್ರ

ಯಾವ ಮೋಹಕ ಕ್ಷಣವು ಬೆಸೆಯಿತು ನನ್ನ ಇವನ ಸ್ನೇಹವ
ಯಾವ ಜನ್ಮದ ನಂಟೋ ಎನೋ ಬಿಡಿಸಲಾಗದೀ ಬಂಧವ
ಹೂವು ಹಾಲಿನ ಮನಸಿನವನು
ಜೇನು ನುಡಿಗಳ ಒಡೆಯನಿವನು
ಚಂದ್ರನಂತೆ ಹೊಳೆಯುವವನು
ನನ್ನ ಪೀತಿಯ ಗೆಳೆಯನಿವನು

ಕಡಲ ಅಲೆಗಳು ಇವನ ನಗುವು
ನೋಡಲೆನಗೆ ನಲಿವೋ ನಲಿವು
ಮಾಸದಿರಲಿ ಈ ನಗುಮೊಗವು
ಬರದಿರಲೆಂದೂ ಇವಗೆ ನೋವು

ಎಲ್ಲ ಬೆಳಕಿಗೂ ಇವನೇ ಕಿರಣ
ಎಲ್ಲ ಸಿಹಿಗೂ ಇವನೇ ಹೂರಣ
ಎಲ್ಲ ನಲಿವಿಗೂ ಇವನೇ ಕಾರಣ
ಎಲ್ಲ ನೋವಿಗೂ ಇವನೇ ಸಾಂತ್ವನ

ಇವಗೆ ಇಲ್ಲ ಯಾವ ಹೋಲಿಕೆ
ಬೇರೆ ಗೆಳೆತನ ಬೇಕು ಏಕೆ
ಇವನೇ ಸ್ಪರ್ಧಿ ಇವನ ಸ್ಥಾನಕೆ
ಸುಂದರ ಸ್ನೇಹದ ಹೂಬನಕೆ

ಎನ್ನ ನೆನಪಿನ ಬಾನಂಗಳದಲಿ
ಇವ ಬರೆದಿಹ ಚಂದದ ರಂಗೋಲಿ
ಅದರ ಸೊಬಗೆಂದು ಮಾಸದೇ ಇರಲಿ
ಈ ಸ್ನೇಹ ಅಜರಾಮರವಾಗಿರಲಿ