ಪ್ರೀತಿ ಬಂದಾಗ

ತಿಳಿಯಾದ ಎದೆಗೊಳವ ನೀ ಬಂದು ಕಲಕಿದೆ
ಹಾಯಾಗಿದ್ದ ನಾನಿಂದು ನಿನ್ನಿಂದ ನಲುಗಿ ಹೋದೆ
ಬಿಳಿ ಹಾಳೆಯಂತಿದ್ದ ನನ್ನ ಮನದ ಪುಸ್ತಕದೆ
ಎಲ್ಲಿಂದಲೋ ನೀ ಬಂದು ನಿನ್ನ ಹೆಸರ ಬರೆದೆ

ಇದೇ ಮೊದಲ ಬಾರಿ ನನಗೆ ಇಂಥ ಅನುಭವ
ಅರಿಯದೇ ಬಂದ ಪ್ರೀತಿ ತಂತು ಈ ಸಿಹಿ ನೋವ
ಏನೋ ಕಳೆದ ಏನೋ ಪಡೆದ ಮಿಶ್ರ ಭಾವನೆ
ಏನಾಗುತಿದೆ ನನ್ನೊಳಗೆ ಅರಿಯದಾದೆ ನಾನೇ

ಮುಚ್ಚಿದ್ದ ಎದೆಕದವ ನೀ ಬಂದು ತೆರೆದೆ
ನೀ ತಂದ ಹೊಸ ಬೆಳಕು ತನುಮನವ ತುಂಬಿದೆ
ಪ್ರೀತಿ ಕುರುಡು ಅನ್ನೋ ವಾದ ನಾನಿಂದು ಒಪ್ಪಲಾರೆ
ಅದೇ ಬೆಳಕು ಅದೇ ಬದುಕು ಅದರಿಂದಲೇ ಈ ಧರೆ

ಎದೆಯ ಹಕ್ಕಿ ಹಾರಾಡಿದೆ ತುಂಬಿ ಬಾನಿನಗಲ
ಮುಟ್ಟುವಾಸೆ ಮೇಲೇರಿ ನಿನ್ನೊಡನೆ ಬಿಳಿ ಮುಗಿಲ
ಒಲವು ಮೂಡಿ ಬಂದಾಗ ಜಗವೆಲ್ಲಾ ಸುಂದರ
ಪ್ರೀತಿ ತುಂಬಿದ ಕಣ್ಣಿಗೆ ಬದುಕು ಹೂವ ಹಂದರ