ಕನಸಿನ ಕನ್ಯೆ

ಕನಸಲಿ ನೋಡಿದ ಮನವನು ಕಾಡಿದ ಹೆಣ್ಣು ಯಾರಿವಳು
ತುಟಿಯೆ ತೆರೆಯದೆ ಕಣ್ಣ ಸನ್ನೆಲೆ ಏನೋ ಹೇಳಿದಳು
ಅರಿಯದೆ ಏನೂ ಹೊರಳಿದೆ ನಾನು ಜಾಗರ ಇಡೀ ಇರುಳು
ನಿದ್ದೆಯ ಜೊತೆಗೆ ಆಟವ ಆಡಿ ನನ್ನ ನೆಮ್ಮದಿ ದೋಚಿದಳು

ಕಮಲದ ನಯನ ಚಿಟ್ಟೆಯ ರೆಪ್ಪೆ ಪಟ ಪಟ ಬಡಿಯುತಿದೆ
ಏನೋ ಹೇಳಲು ಹೊರಟ ತುಟಿಗಳು ಅರಿಯದೇ ನಾಚುತಿವೆ
ಕರಿಮುಗಿಲಂದದೆ ಹಾರುವ ಕುರುಳು ಮಲಗಿವೆ ಹಣೆ ಮೇಲೆ
ಸರಿಸುತಿದೆ ಅದ ಕೋಮಲ ಬೆರಳು ಮುದ್ದು ಸುಕೋಮಲೆ ಈ ಬಾಲೆ

ಕೆನ್ನೆಯ ನುಣುಪು ತುಟಿಗಳ ಹೊಳಪು ಓಕುಳಿಯಾಡುತಿವೆ
ದಾಳಿಂಬೆಯ ಕಾಳಿನ ಬಿಳಿ ಹಲ್ಲುಗಳು ಪಳಪಳ ಹೊಳೆಯುತಿವೆ
ಕನಸಿನ ಕನ್ಯೆಯ ಪಡೆವುದು ಹೇಗೆ ಯೋಚಿಸಿ ನಾ ಸೋತೆ
ಇರುಳದು ಸರಿದರೂ ಕನಸಿನ ಗುಂಗಲೇ ನಾ ಹಗಲೂ ಮೈಮರೆತೆ